Fare ved bruk av rundballepresse
- Klemfare
- Feil ved vedlikehald
- Brannfare
- Fallulykker
- Traktorkopling og kraftuttak
Klemfare
Om du prøver å fjerne fast høy eller halm når maskina går, kan du bli dratt inn og få alvorlege skadar med dødeleg utfall. Edgar Morten Urtegård fekk i 2015 verkeleg kjenne på kroppen kor galt det kunne gå. Edgar stoppa motoren før han gjekk ut av traktoren for å undersøke kvifor rundballepressa hadde stoppa opp. Til tross for dette, starta maskina og han blei dradd inn og pakka inn i plasten. «Hadde jeg fått plasten rundt hele meg hadde jeg vært ferdig, sier Urtegård». Her kan du lese meir om ulykka.
Feil ved vedlikehald
For at rundballepressa skal fungere sikkert, må den vedlikehaldas. Manglande eller feil utført vedlikehald kan føre til mekanisk svikt, som igjen kan forårsake plutselege bevegelsar eller eksplosjon i hydraulikksystemet. Når du skal vedlikehalde rundballepressa, hugs å skru av traktoren og trykk inn nødstoppen. Blås rein, og vask maskina grundig. Kontroller oljen, og smør kjedene ved behov. Les brukarrettleiinga, og ver oppmerksam på lydar og uvanlege bevegelsar. Her har Felleskjøpet har lagt ut ein videoen om vedlikehald av rundballepressa.
Brannfare
Ved ein kombinasjon av overoppheta maskin og oljelekkasje eller gnist, kan tørt materiale som høy og halm lett ta fyr. Hugs på at det er viktig å ha brannslokkingsapparatet og førstehjelpsskrin lett tilgjengeleg i traktoren. Du kan vere langt vekk frå ditt eige gardsbruk når uhellet oppstår. Silke Hansen, HMS-rådgivar ved NLR har tidlegare skrive ein artikkel om brann i tresker, rundballepresse eller traktor, den finner du her.
Fallulykker
Kvar dag er det mange menneskjer som arbeider i høgda, og fall er ein av verstingane når det kjem til arbeidsulykker i Noreg. Arbeid ved rundballepressa, er intet unntak. Utan god balanse eller sikring kan ein ramle ned ved utføring av arbeid på toppen av pressa. . Her har Skydda ein artikkel der dei seier litt meir inngåande kva som forårsakar fallulykker, førebygging og sikkert arbeid i høgda.
Traktorkoblingar og kraftuttak
Kraftuttaket mellom traktor og presse er ein annan risikofaktor i arbeidet. Rotasjonshastigheita og krafta i PTO-akselen kan fange klede, hår eller kroppsdelar dersom dei ikkje er tildekt eller riktig sikra. Det kan gå svært galt.
Slik arbeider du tryggare
- Slå alltid av maskina og vent til alle deler har stoppa før inspeksjon, reingjering eller vedlikehald.
- Bruk verneutstyr som hanskar, vernesko, hårstrikk og tettsitjande klede.
- Sørg for at maskina er følgt opp med godt vedlikehald, og at sikkerheitsfunksjonar som nødstopp og deksel er intakt og fungerer.
- Ikkje arbeid aleine, ha alltid nokon i nærheita i tilfelle ei ulykke skjer.
- Få grundig opplæring før du bruker maskina.
- Et godt med mat, søv nok, stopp opp og sett av tid til ein kaffikopp med naboen.
- Utfør vedlikehald på formiddag, slik at du slepp uføresett og drygt arbeid utover kvelden.
Konklusjon
Rundballepresser er nyttige, men kraftige og potensielt farlege. I landbruket er sikkerheit noko vi alltid må ta på alvor – både for vår egen og andre si skuld. Bruk hovudet, snakk med ein erfaren bonde, sørg for godt vedlikehald og sist men ikkje minst, ta ALDRI snarvegar.
Gi opplæring i kvifor du gjer jobben som du gjer, og del av dine erfaringar. Hugs på at neste generasjon ser kva du gjer, men har enda ikkje kompetansen til å vite kvifor du gjer som du gjer. I landbruket er sikkerheit ikkje berre eit ansvar, det er ei livsnødvendigheit.
Møt utkvilt, og ta deg tid til pause.
Det kostar meir tid og energi om utstyret ryk, eller du blir skadd.
