Synnaland ved Brattvåg i Haram, har ein av dei få førekomstane i Noreg, av kystblåstjerne, Tractema verna. Langvarig skjøtsel med beiting eller slått har ført til auka førekomst.
Biolog John Bjarne Jordal laga skjøtselsplan for området i 2007. Sidan 2009 har NLR på hatt ansvaret for skjøtsel av fem mindre areal på Synnaland. Dette er areal som tidlegare vart beita, men som no er truga av attgroing. I tillegg blir det kvart år talt plantar på fem avmerka flater. Desse teljingane skal vise om skjøtselstiltaka er effektive når det gjeld å ta vare på kystblåstjerna.
I Møre og Romsdal er det berre Synnaland som har ein førekomst av kystblåstjerna. Dette er ei vesteuropeisk plante som i Noreg elles er kjent frå Karmøy i Rogaland og ytre deler av Sogn og Fjordane. Arten veks i opne engsamfunn som har vore skjøtta ved slått eller beite gjennom lang tid, og som ikkje har vore pløgd eller gjødsla. Av dei ca. 15 kjende lokalitetane i Haram er det no berre fem-seks som er intakte og kan bergast. I dei andre er arten forsvunnen som følgje av attgroing eller utbygging. Nokre av dei intakte ligg i eit område som er under utbygging til bustader.
Merknad.- På areala 1 – 4, har førekomsten av kystblåstjerne halde seg godt oppe, i dei ti åra med skjøtsel. Regresjonsanalyse syner statistisk sikker auke i åra med skjøtsel. Dei årlege variasjonane har vore store. På areal 5, Nedom Nausthaugen, var det observert kystblåstjerne tidlegare. I åra 2011-15 fann ein ikkje arten. I 2016 vart slåtte-arealet flytta litt mot nord, der ein fann nokre få plantar. Det er tett vegetasjon på arealet, med mjødurt og krattlodnegras.
I alle år er det gjennomført slått kring 1. august på areala 1,2 og 5. Plantane får liggje og tørke 4-7 dagar, før raking og fjerning. Frå og med 2018 blir det gjennomført to slåttar, kring 1. juli og 1. august på areal 1, 2 og 5. Her er tett vegetasjon. I 2018 vart det gjennomført hogst av tre kring areala 1,2 og 5.
