Separert tørr storfegjødsel i grønfôråker

I begge felta har ekstra nitrogen i frå OPTI-NS gitt liten eller ingen verknad, og det er lite meir i avling for aukande mengde Fullgjødsel^®. Ut frå resultatet kan vi tilrå bruk av separert tørr storfegjødsel til grønfôr på kulturjord i god hevd. For å gi eit tydeleg råd på skrinnare jord er meir utprøving nødvendig.

Bakgrunn

For å kunne gi gode råd om bruken av separert husdyrgjødsel hadde NLR Innlandet felt på eng i 2021. Der kom det fram at den tørre separerte fraksjonen var ueigna på grasmark, på alle våre felt. Derfor beslutta vi å gjennomføre forsøk i åpenåker i 2022. Målet var å gi svar på effektar av separert tørr storfegjødsel, samanlikna med vanleg storfegjødsel og Fullgjødsel^® i korn til grønnfôr, raigras eller attlegg, målt i avling.

Gjennomføring og forsøksopplegg

I store delar av Innlandet er det ei øvre grense på 17 kg total-nitrogen frå husdyrgjødsel per dekar. For å finne praktiske råd var det viktig at vi heldt oss under denne grensa. På rutene med blaut storfegjødsel brukte vi 3 tonn/dekar, medan separert tørr del fekk 5 tonn/dekar.

Forholdet mellom karbon og nitrogen, også kalt C/N, i tørr separert gjødsel kan variere, men heng saman med tørrstoffinnholdet slik at tørrare gjødsel har høgare C/N-forhold. Høgt C/N-forhold betyr at nitrogen vert bunde opp. På grunn av C/N-forholdet ville vi ha eit eige ledd med tørr separert + OPTI-NS, slik at vi kunne vurdere denne effekten.

Etter at gjødsla var fordelt på feltet, jordarbeida bonden denne ned og sådde korn og raigras. Ut på sommaren registrerte vi avlinga på 1.slåtten. Etterveksten på hausten vart ikkje målt.